தென்மேற்கு பருவமழை தீவிரம்: பல பகுதிகளுக்கு 100 மி.மீ.க்கு மேல் கனமழை எச்சரிக்கை!

தென்மேற்கு பருவப்பெயர்ச்சி தற்போது தீவிரமடைந்துள்ளதன் காரணமாக, இலங்கையின் தென்மேற்குப் பகுதிகளில் நிலவும் மழை மற்றும் பலத்த காற்றுடனான வானிலை இன்றும் (01) தொடரும் என்று வளிமண்டலவியல் திணைக்களம் அறிவித்துள்ளது.

அதன்படி, மேல், சப்ரகமுவ மற்றும் வடமேல் மாகாணங்களிலும், கண்டி, நுவரெலியா, காலி மற்றும் மாத்தறை மாவட்டங்களிலும் அவ்வப்போது மழை பெய்யக்கூடும். குறிப்பாக சில பகுதிகளில் 100 மில்லிமீற்றருக்கும் அதிகமான கனமழை பதிவாகும் வாய்ப்பு இருப்பதாக வானிலை முன்னறிவிப்பில் தெரிவிக்கப்பட்டுள்ளது.

இதனால் தாழ்வான பகுதிகளில் நீர்த்தேக்கம், வெள்ளப்பெருக்கு மற்றும் மண்சரிவு அபாயங்கள் ஏற்படக்கூடும் என்பதால், பொதுமக்கள் அவதானத்துடன் செயல்படுமாறும், வளிமண்டலவியல் திணைக்களம் மற்றும் அனர்த்த முகாமைத்துவ மையம் வெளியிடும் மேலதிக அறிவிப்புகளை தொடர்ந்து கவனிக்குமாறும் அறிவுறுத்தப்பட்டுள்ளது.