104 புதிய லோ-புளோர் பேருந்துகளுடன் விரிவடையும் மெட்ரோ பஸ் சேவை – 7 புதிய வழித்தடங்கள் அறிமுகம்

புதிய அரசாங்கத்தின் மிகவும் வரவேற்பைப் பெற்ற மெட்ரோ பஸ் (Metro Bus) திட்டம் தற்போது முழுமையாக நடைமுறைப்படுத்தப்பட்டு வருகிறது. இலங்கையின் நகரப் பொதுப் போக்குவரத்தை நவீனமயமாக்கும் நோக்கில் ஆரம்பிக்கப்பட்ட இந்தத் திட்டம், 10 லோ-புளோர் பேருந்துகளுடன் வெற்றிகரமாக முன்னோடித் திட்டமாக செயல்படுத்தப்பட்டது.

அதன் வெற்றியைத் தொடர்ந்து, கொழும்பு மற்றும் அதனைச் சுற்றியுள்ள பகுதிகளில் 7 புதிய வழித்தடங்களில் சேவை விரிவுபடுத்தப்படவுள்ளது. இதற்காக முதியோர் மற்றும் மாற்றுத்திறனாளிகள் எளிதில் பயன்படுத்தும் வகையில் வடிவமைக்கப்பட்ட 104 புதிய லோ-புளோர் பேருந்துகள் சேவையில் இணைக்கப்படுகின்றன.

மேலும், ஏற்கனவே ஒப்பந்தம் செய்யப்பட்ட 100 பேருந்துகளுடன் சேர்த்து மேலும் 50 லோ-புளோர் பேருந்துகளை கொள்வனவு செய்ய அமைச்சரவை அங்கீகாரம் வழங்கப்பட்டுள்ளது.

இந்த மெட்ரோ பஸ் சேவையில் நிகழ்நேர பேருந்து கண்காணிப்பு (Real-time Tracking), Tap-in / Tap-out இலத்திரனியல் கட்டண முறை, நேரலை வருகை தகவல் திரைகள் மற்றும் மத்திய செயல்பாட்டு மேலாண்மை போன்ற நவீன வசதிகளும் இடம்பெறுகின்றன.

எதிர்காலத்தில் இந்த சேவை கண்டி, காலி மற்றும் யாழ்ப்பாணம் உள்ளிட்ட முக்கிய நகரங்களுக்கும் விரிவுபடுத்தப்படவுள்ளதாக அறிவிக்கப்பட்டுள்ளது.