சொகுசு ஜீப்பில் 17.9 கிலோ கஞ்சா: இளம் தம்பதியினர் கைது!

புத்தளம்–சிலாபம் பிரதான வீதியில் உள்ள பட்டுலுஓயா பொலிஸ் சோதனைச் சாவடியில் நேற்று இரவு மேற்கொள்ளப்பட்ட சோதனை நடவடிக்கையின்போது, சொகுசு ஜீப்பில் பயணித்ததாகக் கூறப்படும் இளம் தம்பதியினர் கைது செய்யப்பட்டுள்ளனர்.

சந்தேகநபர்கள் பயணித்த வாகனத்தை பொலிஸார் சோதனையிட்டபோது, 17 கிலோகிராம் 985 கிராம் கஞ்சா கைப்பற்றப்பட்டுள்ளதாக தெரிவிக்கப்படுகிறது.

கைது செய்யப்பட்ட 24 வயதுடைய இளைஞர் மொனராகலை – ஹப்பேகமுவ பகுதியைச் சேர்ந்தவர் எனவும், 23 வயதுடைய இளம் பெண் ராஜாங்கனை பகுதியைச் சேர்ந்தவர் எனவும் தெரிவிக்கப்பட்டுள்ளது. திருமணத்திற்குப் பின்னர் இருவரும் அவ்வப்போது இளைஞரின் வீட்டில் வசித்து வந்ததாகவும் பொலிஸார் தெரிவித்துள்ளனர்.

கைப்பற்றப்பட்ட கஞ்சா எங்கிருந்து கொண்டு வரப்பட்டது, எங்கு கொண்டு செல்லப்படவிருந்தது மற்றும் இந்த கடத்தலின் பின்னணியில் மேலும் நபர்கள் உள்ளனரா என்பது தொடர்பில் பொலிஸார் மேலதிக விசாரணைகளை முன்னெடுத்து வருகின்றனர்.

குற்றச்சாட்டுகள் நீதிமன்றத்தில் நிரூபிக்கப்படும் வரை கைது செய்யப்பட்டவர்கள் சந்தேகநபர்களாகவே கருதப்படுவர்.