ஆகஸ்ட் 28-ல் அரிய பகுதி சந்திரகிரகணம் – இலங்கையில் காண முடியாது!

எதிர்வரும் ஆகஸ்ட் 28ஆம் திகதி அரிய பகுதி சந்திரகிரகணம் நிகழவுள்ளது. சூரியனுக்கும் சந்திரனுக்கும் இடையில் பூமி வரும்போது, பூமியின் நிழல் சந்திரன் மீது விழுவதால் சந்திரகிரகணம் ஏற்படுகிறது.

இந்த கிரகணத்தின் போது நிலவின் 96 சதவீத பகுதி பூமியின் நிழலால் மறைக்கப்பட்டு, 4 சதவீத பகுதி மட்டுமே வெளிச்சமாகத் தோன்றும். இதனால் இது பகுதி சந்திரகிரகணமாக இருந்தாலும், கிட்டத்தட்ட முழு சந்திரகிரகணத்தைப் போன்று நிலவு சிவப்பு நிறத்தில் காட்சியளிக்கும். இதுவே இந்த நிகழ்வின் சிறப்பம்சமாகும்.

பூமியின் வளிமண்டலத்தை ஊடறுத்துச் செல்லும் சூரிய ஒளி சந்திரனை அடைவதால், நிலவு சிவப்பு நிறத்தில் தோன்றும் இந்த நிகழ்வு “ரத்த நிலவு” (Blood Moon) என அழைக்கப்படுகிறது.

இந்த கிரகணம் வட மற்றும் தென் அமெரிக்காவில் தெளிவாகக் காணப்படும் என எதிர்பார்க்கப்படுகிறது. ஐரோப்பா, ஆப்பிரிக்கா மற்றும் மேற்கு ஆசியாவின் சில பகுதிகளிலும் பகுதியளவில் தெரியும். சுமார் 100 கோடி மக்கள் இதனை நேரடியாகக் காண வாய்ப்புள்ளதாக வானியல் வல்லுநர்கள் கணித்துள்ளனர்.

ஆனால் இலங்கை, இந்தியா, அவுஸ்திரேலியா, அண்டார்டிகா மற்றும் பசுபிக் பெருங்கடல் பகுதிகளில் இந்த கிரகணத்தை காண முடியாது. இலங்கை நேரப்படி இது காலை 8:04 மணிக்கு தொடங்கி, 9:43 மணிக்கு உச்சத்தை எட்டி, 11:22 மணிக்கு நிறைவடையும். அந்நேரம் இலங்கையில் பகல் நேரமாக இருப்பதே இதனைப் பார்க்க முடியாததற்குக் காரணமாகும்.