அஸ்வெசும நிதி மோசடி: ரூ.29.89 லட்சம் மோசடி செய்ததாக இரண்டு பெண் அதிகாரிகள் கைது!

பொருளாதார ரீதியாக பாதிக்கப்பட்ட குடும்பங்களுக்கு வழங்கப்படும் அஸ்வெசும நலன்புரி திட்ட கொடுப்பனவுகளில் இடம்பெற்றதாகக் கூறப்படும் ஊழல் மற்றும் நிதி மோசடி தொடர்பில், நோர்வூட் பிரதேச செயலகத்தில் பணியாற்றி வந்த 33 மற்றும் 30 வயதுடைய இரண்டு பெண் அதிகாரிகள் ஹட்டன் விசேட குற்ற விசாரணைப் பிரிவினரால் கைது செய்யப்பட்டுள்ளனர்.

அஸ்வெசும நிதி விநியோகத்தில் முறைகேடுகள் இடம்பெற்றதாக பல முறைப்பாடுகள் கிடைத்ததையடுத்து, நுவரெலியா மாவட்ட செயலாளரின் நேரடி அறிவுறுத்தலின் பேரில் விசாரணைகள் ஆரம்பிக்கப்பட்டன. விசாரணைகளுக்கு இடையூறு ஏற்படாத வகையில், சம்பந்தப்பட்ட இரு அதிகாரிகளும் அம்பகமுவ மற்றும் தலவாக்கலை பிரதேச செயலகங்களுக்கு தற்காலிகமாக இடமாற்றம் செய்யப்பட்டிருந்தனர்.

பின்னர் நோர்வூட் பிரதேச செயலாளர் ஹட்டன் விசேட குற்ற விசாரணைப் பிரிவில் முறைப்பாடு செய்ததைத் தொடர்ந்து இருவரும் கைது செய்யப்பட்டனர். ஆரம்பகட்ட விசாரணைகளின்படி, 2025 ஆம் ஆண்டு முதல் இதுவரை ரூ.29,89,500 மோசடி செய்யப்பட்டுள்ளதாக தெரியவந்துள்ளது.

இந்த மோசடியில் மேலும் இரண்டு சந்தேகநபர்கள் தொடர்புடையதாக தகவல்கள் வெளியாகியுள்ளன. கைது செய்யப்பட்ட இரு அதிகாரிகளும் சனிக்கிழமை ஹட்டன் நீதவான் நீதிமன்றத்தில் முன்னிலைப்படுத்தப்படவுள்ளதுடன், சம்பவம் தொடர்பான மேலதிக விசாரணைகளை ஹட்டன் குற்ற விசாரணைப் பிரிவு தொடர்ந்து மேற்கொண்டு வருகிறது.