ஹோமாகம தொழிற்சாலை தீ விபத்து: 5 பேர் உயிரிழப்பு – மீட்புப் பணிகள் தீவிரம்

ஹோமாகம கட்டுவான கைத்தொழில் வலயத்தில் அமைந்துள்ள தலைக்கவசம் தயாரிக்கும் தொழிற்சாலையில் இன்று (21) காலை ஏற்பட்ட பாரிய தீ விபத்தில் 5 பேர் உயிரிழந்துள்ளதாக ஹோமாகம பொலிஸார் தெரிவித்துள்ளனர்.

தீ விபத்து ஏற்பட்ட நேரத்தில் தொழிற்சாலையில் 80-க்கும் மேற்பட்ட ஊழியர்கள் பணியில் இருந்ததாக ஆரம்ப தகவல்கள் தெரிவிக்கின்றன. தீயணைப்பு பிரிவினர் விரைவாக சம்பவ இடத்துக்கு விரைந்து தீயை கட்டுப்பாட்டுக்குள் கொண்டு வரும் பணியில் ஈடுபட்டனர்.

தற்போது தீ பெருமளவில் கட்டுப்படுத்தப்பட்டுள்ள போதிலும், தொழிற்சாலைக்குள் மேலும் யாரேனும் சிக்கியுள்ளனரா என்பதை உறுதிப்படுத்த தேடுதல் மற்றும் மீட்புப் பணிகள் தொடர்ந்து முன்னெடுக்கப்பட்டு வருகின்றன.

இந்த தீ விபத்திற்கான காரணம் இதுவரை அதிகாரப்பூர்வமாக அறிவிக்கப்படவில்லை. சம்பவம் தொடர்பாக ஹோமாகம பொலிஸார் மேலதிக விசாரணைகளை மேற்கொண்டு வருகின்றனர்.