வெதுப்பக உரிமையாளர்களுக்கு புதிய கட்டுப்பாடுகள் – இன்று முதல் அமல்!

மண்முனை தென்எருவில் பற்று பிரதேச சபையின் ஏற்பாட்டில், களுவாஞ்சிக்குடி பொதுவிளையாட்டு மைதானத்தில் அனைத்து வெதுப்பக (பேக்கரி/உணவு விற்பனை) உரிமையாளர்களையும் இணைத்து விழிப்புணர்வு கூட்டம் நடைபெற்றது. இதில் பிரதேச சபை தவிசாளர் மற்றும் களுவாஞ்சிக்குடி பொதுச் சுகாதார பரிசோதகர் உள்ளிட்ட அதிகாரிகள் கலந்து கொண்டு, உணவு பாதுகாப்பு மற்றும் சுகாதார நடைமுறைகள் தொடர்பான புதிய சட்டங்கள் மற்றும் விதிமுறைகளை விளக்கினர்.

கூட்டத்தில், உணவுப் பொருட்களை சுகாதார விதிகளுக்கு இணங்க வாகனங்களில் கொண்டு செல்லுதல் மற்றும் விற்பனை செய்தல், பணியின்போது சுத்தமான மற்றும் பொருத்தமான சீருடை அணிதல், உடலில் அலங்கார நகைகள் அல்லது தேவையற்ற அணிகலன்கள் அணியக்கூடாது, உணவு கையாளும் போது சுகாதார நடைமுறைகளை கட்டாயமாகப் பின்பற்றுதல் உள்ளிட்ட பல முக்கிய அறிவுறுத்தல்கள் வழங்கப்பட்டன. மேலும், ஒரு வாகனத்தில் ஒருவர் மட்டுமே பயணிக்க வேண்டும் என்பதுபோன்ற போக்குவரத்து தொடர்பான ஒழுங்குகளும் வலியுறுத்தப்பட்டன.

இந்த புதிய விதிமுறைகள் இன்று முதல் அமலுக்கு வருவதாகவும், அவற்றை மீறுபவர்களுக்கு நடைமுறையில் உள்ள சட்டங்களின் கீழ் வழக்குத் தாக்கல் செய்து நடவடிக்கை எடுக்கப்படும் என்றும் பொதுச் சுகாதார பரிசோதகர் எச்சரித்தார். நிகழ்வில் பிரதேச சபை தவிசாளர் வெதுப்பக உரிமையாளர்களுக்கு பல பயனுள்ள ஆலோசனைகளையும் வழங்கியதுடன், இந்த நடவடிக்கைகள் பொதுமக்களுக்கு தரமான மற்றும் பாதுகாப்பான உணவுப் பொருட்கள் கிடைப்பதை உறுதி செய்ய உதவும் என நம்பிக்கை தெரிவித்தார்.