பொலன்னறுவையில் பேருந்து–மோட்டார் சைக்கிள் விபத்து: தாயும் மகனும் பலி

பொலன்னறுவை, பகமூண – தம்புள்ளை வீதியின் தமனயாய பகுதியில் இன்று (11) அதிகாலை இடம்பெற்ற பேருந்து–மோட்டார் சைக்கிள் விபத்தில் தாயும் அவரது மகனும் உயிரிழந்துள்ளனர்.

கொழும்பில் இருந்து கல்முனை நோக்கிப் பயணித்த சொகுசு பேருந்து, முன்னால் சென்ற மோட்டார் சைக்கிள் தமனயாய பகுதிக்குத் திரும்ப முயன்றபோது மோதியதில் இந்த விபத்து இடம்பெற்றுள்ளதாக பொலிஸார் தெரிவித்துள்ளனர்.

விபத்தில் பகமூண, தமனயாய பகுதியைச் சேர்ந்த 63 வயதுடைய பெண்ணும், அவரது 43 வயது மகனும் உயிரிழந்துள்ளனர். அவர்களுடன் பயணித்த ஒன்றரை வயது குழந்தை காயமடைந்து பொலன்னறுவை போதனா வைத்தியசாலையில் சிகிச்சைக்காக அனுமதிக்கப்பட்டுள்ளது.

விபத்து அதிகாலை 1.25 மணியளவில் இடம்பெற்றுள்ளதாக பகமூண பொலிஸார் தெரிவித்துள்ளனர். சம்பவத்துடன் தொடர்புடைய பேருந்தின் சாரதி கைது செய்யப்பட்டுள்ளதுடன், மேலதிக விசாரணைகள் முன்னெடுக்கப்பட்டு வருகின்றன.

மேலும், பேருந்து அதிக வேகத்தில் செலுத்தப்பட்டதாக பொதுமக்கள் சிலர் குற்றச்சாட்டுகளை முன்வைத்துள்ள நிலையில், இது தொடர்பான விசாரணைகளும் இடம்பெற்று வருகின்றன. போக்குவரத்து விதிகளைப் பின்பற்றி அவதானமாக வாகனங்களை செலுத்துவது விபத்துகளைத் தவிர்க்க முக்கியமானதாகும்.