கல்முனையில் திடீர் சுகயீனத்தால் கட்டுப்பாட்டை இழந்த வாகனம் லொத்தர் கடைக்குள் பாய்ந்தது – சாரதி உயிரிழப்பு, கடை உரிமையாளர் காயம்

அம்பாறை மாவட்டம் கல்முனை ஆதார வைத்தியசாலைக்கு அருகிலுள்ள கல்முனை – பாண்டிருப்பு பிரதான வீதியில் நேற்று (02) மாலை இடம்பெற்ற கோர வீதி விபத்தில் வாகன சாரதி ஒருவர் உயிரிழந்துள்ளதுடன், லொத்தர் விற்பனை நிலைய உரிமையாளர் ஒருவர் படுகாயமடைந்து வைத்தியசாலையில் சிகிச்சை பெற்று வருகிறார்.

பொலிஸார் தெரிவித்ததன்படி, மட்டக்களப்பிலிருந்து கல்முனை நோக்கிப் பயணித்துக் கொண்டிருந்த சிறிய ரக வாகனம், தாழவட்டுவான் சந்தியை அண்மித்தபோது சாரதிக்கு திடீரென ஏற்பட்ட உடல்நலக் குறைவு காரணமாக கட்டுப்பாட்டை இழந்துள்ளது. அதனைத் தொடர்ந்து, வீதியோரத்தில் அமைந்திருந்த அபிவிருத்தி லொத்தர் விற்பனை நிலையத்திற்குள் அதிவேகமாக மோதிய வாகனம் தலைகீழாக புரண்டுள்ளது.

விபத்தின் தாக்கத்தால் லொத்தர் விற்பனை நிலையம் கடுமையாக சேதமடைந்ததுடன், அதன் கட்டமைப்பு, தூண்கள் மற்றும் மின்விளக்குகள் உள்ளிட்ட பல பொருட்களும் நாசமடைந்துள்ளன.

சம்பவத்தில் படுகாயமடைந்த வாகன சாரதியும், லொத்தர் விற்பனை நிலையத்தில் இருந்த உரிமையாளருமான மூர்த்திதம்பி வேணு தாஸ் (56) ஆகியோர் அப்பகுதி மக்களின் உதவியுடன் மீட்கப்பட்டு கல்முனை ஆதார வைத்தியசாலையில் அனுமதிக்கப்பட்டனர்.

எனினும், சிகிச்சை பலனின்றி வாகன சாரதியான கமகே சுனில் சாந்த (63), பொலன்னறுவை பகுதியைச் சேர்ந்தவர், உயிரிழந்துள்ளார். அவருக்கு திடீரென மாரடைப்பு அல்லது வேறு உடல்நலக் குறைவு ஏற்பட்டிருக்கலாம் என்ற கோணத்தில் விசாரணைகள் முன்னெடுக்கப்பட்டு வருகின்றன.

இதற்கிடையில், காயமடைந்த லொத்தர் விற்பனை நிலைய உரிமையாளர் தொடர்ந்து வைத்தியசாலையில் சிகிச்சை பெற்று வருகிறார். சம்பவம் தொடர்பான மேலதிக விசாரணைகளை கல்முனைப் பொலிஸார் மேற்கொண்டு வருகின்றனர்.