கல்கிசை கடலில் அடித்துச் செல்லப்பட்ட இளைஞர் – பொலிஸ் உயிர்காக்கும் அதிகாரிகளின் துரித நடவடிக்கையால் உயிர் தப்பினார்!

கல்கிசை மவுண்ட் லவினியா ஹோட்டலுக்கு அருகிலுள்ள கடற்கரையில் (08.01) பிற்பகல் உயிர் ஆபத்தான சம்பவம் ஒன்று பதிவாகியுள்ளது. கடற்கரையில் விளையாடிக் கொண்டிருந்த குழுவினரின் பந்து கடலுக்குள் சென்றதை எடுக்க, சிவப்புக்கொடி எச்சரிக்கை இருந்தபோதும் மொரட்டுவையைச் சேர்ந்த 33 வயதுடைய இளைஞர் கடலில் இறங்கியுள்ளார்.

அப்போது கடல் மிகவும் கொந்தளிப்பாக இருந்ததால் அவர் பலத்த நீரோட்டத்தில் சிக்கி சுமார் 75 மீட்டர் தூரம் கடலுக்குள் அடித்துச் செல்லப்பட்டார். இதைக் கவனித்த கல்கிசை பொலிஸ் உயிர்காக்கும் அதிகாரிகள் உடனடியாக மீட்பு நடவடிக்கையில் ஈடுபட்டு, அவரை பாதுகாப்பாக கரைக்கு கொண்டு வந்தனர்.

மீட்கப்பட்ட இளைஞருக்கு சம்பவ இடத்திலேயே முதலுதவி வழங்கப்பட்டதுடன், மேலதிக மருத்துவ பரிசோதனை மற்றும் சிகிச்சைக்காக அவரது நண்பர்களுடன் செல்லுமாறு பொலிஸார் அறிவுறுத்தினர். இந்தச் சம்பவம், சிவப்புக்கொடி எச்சரிக்கை விடுக்கப்பட்டுள்ள நேரங்களில் கடலில் இறங்குவதால் ஏற்படும் உயிர் ஆபத்தை மீண்டும் நினைவூட்டுகிறது.