இரத்மாலானையில் வீடொன்றின் மீது கைக்குண்டுத் தாக்குதல் – பாதாள உலகத் தொடர்புகள் குறித்து புதிய தகவல்கள் வெளியானது

இன்று (05) அதிகாலை இரத்மாலானை, ஸ்ரீ ஞானேந்திர வீதியில் அமைந்துள்ள இருமாடி வீடொன்றின் மீது அடையாளம் தெரியாத நபர்கள் இரண்டு கைக்குண்டுகளை வீசி தாக்குதல் நடத்தியுள்ளனர்.

பொலிஸாரின் தகவலின்படி, வீசப்பட்ட இரண்டு கைக்குண்டுகளில் ஒன்று வெடித்துள்ளதுடன், மற்றையது வீட்டின் தோட்டத்தில் வெடிக்காமல் கிடந்த நிலையில் பாதுகாப்பாக மீட்கப்பட்டுள்ளது.

இந்தச் சம்பவத்தில் எவருக்கும் உயிர்சேதமோ காயமோ ஏற்படவில்லை. இருப்பினும், வீட்டின் இரண்டு ஜன்னல் கண்ணாடிகள் சேதமடைந்துள்ளன.

தாக்குதலுக்குள்ளான வீட்டின் உரிமையாளர், தற்போது வெளிநாட்டில் வசிப்பதாகக் கூறப்படும் ரஸல் அலோசியஸ் ஸ்மித்தின் தந்தையின் சகோதரரின் மகன் என ஆரம்பகட்ட விசாரணைகளில் தெரியவந்துள்ளது.

மேலும், ரஸல் அலோசியஸ் ஸ்மித், பாதாள உலகக் குழுத் தலைவர்களாகக் கூறப்படும் 'அஞ்சு' எனப்படும் சிங்ஹார அமல் ஷமிந்த சில்வா மற்றும் 'தர்மே' எனப்படும் எல்லாவல லியனகே தர்மசிரியுடன் நெருங்கிய தொடர்பில் இருந்ததாகவும், பின்னர் அஞ்சுவுடன் ஏற்பட்ட முரண்பாடு இந்தத் தாக்குதலுக்கான பின்னணியாக இருக்கக்கூடும் என்ற கோணத்திலும் விசாரணைகள் முன்னெடுக்கப்பட்டு வருகின்றன.