பல பகுதிகளில் மழை : கடற்பகுதிகளில் பலத்த காற்று மற்றும் கொந்தளிப்பு எச்சரிக்கை

வளிமண்டலவியல் திணைக்களத்தின் சமீபத்திய வானிலை முன்னறிவிப்பின்படி, மேல் மற்றும் சப்ரகமுவ மாகாணங்களிலும், கண்டி, நுவரெலியா, காலி மற்றும் மாத்தறை மாவட்டங்களிலும் இடைக்கிடையே மழை பெய்யக்கூடும். வடமேல் மாகாணத்தில் பல தடவைகள் மழை பெய்யும் சாத்தியம் காணப்படுவதுடன், நாட்டின் ஏனைய பகுதிகளில் பெரும்பாலும் வறட்சியான வானிலை நிலவும் என தெரிவிக்கப்பட்டுள்ளது.

மேலும், மத்திய மலைநாட்டின் மேற்கு சரிவுப் பகுதிகள், வடமத்திய மற்றும் வடமேல் மாகாணங்கள், திருகோணமலை மற்றும் ஹம்பாந்தோட்டை மாவட்டங்களில் மணித்தியாலத்திற்கு 40 முதல் 50 கிலோமீட்டர் வேகத்தில் பலத்த காற்று வீசக்கூடும்.

கடற்பகுதிகளைப் பொறுத்தவரை, புத்தளத்திலிருந்து கொழும்பு, காலி ஊடாக மாத்தறை வரையிலான கடற்பிராந்தியங்களில் இடைக்கிடையே மழை பெய்யலாம். ஹம்பாந்தோட்டையிலிருந்து பொத்துவில் மற்றும் புத்தளத்திலிருந்து மன்னார், காங்கேசன்துறை ஊடாக முல்லைத்தீவு வரையிலான கடற்பகுதிகளில் காற்றின் வேகம் மணித்தியாலத்திற்கு 50–60 கிலோமீட்டர் வரை அதிகரிக்கக்கூடும்.

அத்துடன், மேற்கண்ட கடற்பகுதிகள் கொந்தளிப்பாகவும், சில பகுதிகள் ஓரளவு கொந்தளிப்பாகவும் காணப்படும் என தெரிவிக்கப்பட்டுள்ளது. மேலும், புத்தளத்திலிருந்து கொழும்பு, காலி, ஹம்பாந்தோட்டை ஊடாக பொத்துவில் வரையிலான கடற்பகுதிகளில் 2.0 முதல் 2.5 மீட்டர் உயரம் வரை கடல் அலைகள் எழக்கூடும் என்பதால், மீனவர்கள் மற்றும் கடல்சார் பயணிகள் மிகுந்த அவதானத்துடன் செயல்படுமாறு வளிமண்டலவியல் திணைக்களம் அறிவுறுத்தியுள்ளது.