மருதமுனை கோர விபத்து: களுவாஞ்சிகுடி பிரதேச செயலக அதிகாரி உயிரிழப்பு

அம்பாறை மாவட்டம் மருதமுனை எரிபொருள் நிரப்பு நிலையத்திற்கு அருகில் இன்று காலை இடம்பெற்ற கொடூர வீதி விபத்தில், களுவாஞ்சிகுடி பிரதேச செயலகத்தில் பணியாற்றிய ஜெயராமன் ஜெகிருஷ்னா சம்பவ இடத்திலேயே உயிரிழந்தார்.

கதிர்காமம் நோக்கி அதிவேகமாகச் சென்ற சொகுசு பேருந்து, அதே திசையில் பயணித்த மோட்டார் சைக்கிளுடன் மோதியதில் இந்த விபத்து ஏற்பட்டதாக தெரிவிக்கப்படுகிறது. விபத்தின் தாக்கத்தால் மோட்டார் சைக்கிளை ஓட்டிச் சென்ற அதிகாரி பலத்த காயமடைந்து உயிரிழந்தார்.

உயிரிழந்த ஜெயராமன் ஜெகிருஷ்னா, மட்டக்களப்பு கல்லடி பகுதியைச் சேர்ந்தவர் என்றும், தற்போது பாண்டியிருப்பில் வசித்து வந்தவர் என்றும் தெரிவிக்கப்பட்டுள்ளது. சம்பவம் தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.