சீரற்ற வானிலை: சிவனொளிபாத மலைப்பாதையில் மண்சரிவு – ஹட்டன்–கொழும்பு வீதியிலும் எச்சரிக்கை

நாட்டில் நிலவி வரும் கடும் சீரற்ற வானிலை காரணமாக சிவனொளிபாத மலை உச்சிக்கு செல்லும் முக்கிய பாதையில் மண்மேடு சரிந்து விழுந்துள்ளதாக நல்லத்தண்ணி பொலிஸார் தெரிவித்துள்ளனர்.

இந்த மண்சரிவால் பாதையில் பயணிப்பது சிரமமாகியுள்ள நிலையில், தற்போது யாத்திரைக் காலம் அல்லாததால் சிவனொளிபாத மலைக்கு செல்லும் உள்நாட்டு மற்றும் வெளிநாட்டு சுற்றுலாப் பயணிகள் இடிக்கட்டுபான ஊடாக இரத்தினபுரி பாதையை பயன்படுத்தி உச்சியை அடையுமாறு அறிவுறுத்தப்பட்டுள்ளது.

வானிலை சீராகும் பின்னர் பாதையில் சரிந்து விழுந்துள்ள மண் மற்றும் மரங்களை அகற்றி வழமையான போக்குவரத்தை மீள ஆரம்பிக்க நடவடிக்கை எடுக்கப்படும் என நல்லத்தண்ணி பொலிஸார் தெரிவித்துள்ளனர்.

இதனுடன், தொடரும் கனமழையால் சில பகுதிகளில் வீதி தாழிறங்கும் அபாயமும் ஏற்பட்டுள்ளதால், குறித்த பகுதிகளில் வாகனப் போக்குவரத்து ஒரு வழிப்பாதையாக மட்டுப்படுத்தப்பட்டுள்ளது.

மேலும், ஹட்டன்–கொழும்பு பிரதான வீதியில் ஹட்டனில் இருந்து கித்துல்கல வரை பயணிக்கும் சாரதிகள் மிகவும் அவதானத்துடன் வாகனங்களை செலுத்துமாறு நிறைவேற்றுப் பொறியியலாளர் எச்சரிக்கை விடுத்துள்ளார்.

அதிகாரிகள் பொதுமக்கள் மற்றும் பயணிகள் தேவையற்ற பயணங்களை தவிர்த்து, வானிலை மற்றும் பாதுகாப்பு அறிவுறுத்தல்களை பின்பற்றுமாறு கேட்டுக்கொண்டுள்ளனர்.