கடும் மழையால் கொத்மலை – கம்பளை பிரதான வீதி தற்காலிகமாக மூடப்பட்டது; மண்சரிவு அபாயம் தீவிரம்

கொத்மலை பகுதியில் தொடர்ந்து பெய்து வரும் கடும் மழை காரணமாக, கொத்மலை – கம்பளை (B431) பிரதான வீதி இன்று(03.08.2026) பிற்பகல் முதல் தற்காலிகமாக மூடப்பட்டுள்ளதாக காவல்துறை அறிவித்துள்ளது.

முன்னதாக மண்சரிவு ஏற்பட்டு வீதி சேதமடைந்திருந்த பரகம்மன பகுதியில், தற்போது பெய்து வரும் கனமழையால் மீண்டும் மண்சரிவு ஏற்படும் அபாயம் அதிகரித்துள்ளதாக அதிகாரிகள் தெரிவித்துள்ளனர். பொதுமக்களின் பாதுகாப்பை உறுதிப்படுத்தும் நோக்கில் இந்த முன்னெச்சரிக்கை நடவடிக்கை எடுக்கப்பட்டுள்ளது.

கம்பளை மற்றும் கொத்மலையை இணைக்கும் முக்கிய போக்குவரத்து பாதையாக உள்ள இந்த வீதி, கடும் மழைக் காலங்களில் மண்சரிவு அபாயத்திற்கு உள்ளாகும் பகுதியாகும். இதனால், இந்த வீதியை பயன்படுத்துவதைத் தவிர்த்து மாற்று வழிகளின் ஊடாக பயணிக்குமாறு அனைத்து வாகன சாரதிகளுக்கும் காவல்துறை அறிவுறுத்தியுள்ளது.

மேலும், மழை தொடருமானால் மலைப்பாங்கான நிலப்பரப்பின் ஸ்திரத்தன்மை மேலும் பாதிக்கப்படக்கூடும் என எச்சரிக்கப்பட்டுள்ளது. சம்பந்தப்பட்ட பகுதி தொடர்ந்து கண்காணிக்கப்பட்டு வருவதாகவும், பாதுகாப்பான சூழல் உறுதி செய்யப்பட்ட பின்னரே வீதி மீண்டும் பொதுமக்கள் பயன்பாட்டிற்காக திறக்கப்படும் என்றும் காவல்துறை தெரிவித்துள்ளது.